छत्तीसगढ़िया ओलंपिक आज से : गिल्ली डंडा, पिट्ठुल, भौंरा-बांटी के संगे संग 14 ठन छत्तीसगढ़िया खेल के ओलंपिक के मुख्यमंत्री करही शुरुआत

रायपुर। अब हमर गांव-गंवतरी के खेल गिल्ली डंडा, पिट्ठुल, बांटी, लंगड़ी, खोखो आउ कबड्डी जइसे 14 ठन छत्तीसगढ़िया खेल के ओलंपिक होही। छत्तीसगढ़ म पहली पइत अइसना आयोजन होत हे। ए आयोजन ह गांव ले लेके शहर तक होही, जेमा लइका सियान सब झन भाग लिहीं। मुख्यमंत्री भूपेश बघेल ह गुरुवार को रायपुर के इंडोर स्टेडियम में एला शुरू करही। खेल मंत्री उमेश पटेल भी संग में रइहीं। 6 स्तर म छत्तीसगढ़िया ओलंपिक के आयोजन होही।

मुख्यमंत्री भूपेश बघेल ह छत्तीसगढ़ में पहली पइत छत्तीसगढ़िया खेल मन ल भी आघु लाए बर आऊ हमर नवा पीढ़ी ल जनवाय पर बड़े स्तर म छत्तीसगढ़िया ओलंपिक के आयोजन करे के निर्देश देहे रहिस। खेल विभाग ह आयोजन के रूपरेखा बनाए हे। अब 6 अक्टूबर ले खेल शुरू होही। पहली गांव गंवतरी में खेल होही। फिर ब्लॉक आउ शहर होत राजधानी म सबले बड़े खेल होही, जेमा इनाम बांटे जाही।

छत्तीसगढ़िया ओलंपिक के शुरुआत राजीव युवा मितान क्लब के स्तर म पहली होही। एकर बार जोन, फेर ब्लॉक, नगर पंचायत-पालिका, फेर जिला आउ संभाग होत राज्य स्तर के आयोजन होही। 6 अक्टूबर ले खेल शुरू होही, जेन ह तीन महीना चलही। 6 जनवरी के एकर समापन होही। महिला आउ पुरुष मन के अलग-अलग आयोजन होही। एमा टीम आउ एकल दूनो परकार के आयोजन होही।

आप मन ल बता दिहिन कि छत्तीसगढ़िया ओलंपिक म टीम स्तर के खेल म गिल्ली डंडा, पिट्टूल, संखली, लंगड़ी दौड़, कबड्डी, खो-खो, रस्साकसी और बांटी (कंचा) के खेल होही। एकल श्रेणी म बिल्लस, फुगड़ी, गेड़ी दौड़, भंवरा, 100 मीटर दौड़ आउ लंबी कूद होही।

छत्तीसगढ़िया ओलंपिक के भव्य शुरुआत होही। एमा अतिथि के रूप म गृहमंत्री ताम्रध्वज साहू, स्वास्थ्य मंत्री टीएस सिंहदेव, कृषि मंत्री रविंद्र चौबे, शिक्षा मंत्री डॉ. प्रेमसाय सिंह टेकाम, वन मंत्री मोहम्मद अकबर, उद्योग मंत्री कवासी लखमा, नगरीय प्रशासन एवं विकास मंत्री डॉ. शिव कुमार डहरिया, महिला एवं बाल विकास मंत्री अनिला भेंड़िया, राजस्व मंत्री जयसिंह अग्रवाल, लोक स्वास्थ्य यांत्रिकी मंत्री गुरू रूद्रकुमार, खाद्य एवं नागरिक आपूर्ति मंत्री अमरजीत भगत, लोकसभा सांसद सुनील सोनी, संसदीय सचिव पारसनाथ राजवाडे और विकास उपाध्याय के संगे संग विधायक सत्यनारायण शर्मा, बृजमोहन अग्रवाल, कुलदीप जुनेजा, महापौर एजाज ढेबर, जिला पंचायत अध्यक्ष डोमेश्वरी वर्मा आउ छत्तीसगढ़ राज्य युवा आयोग के अध्यक्ष जितेन्द्र मुदलियार भी उपस्थित रइहीं।