ये लबरा- लबरी के करतूत अइसने कि रिटायर्ड डीएसपी ल भी लगा दिस चूना, वकील अऊ ब्रोकर बनके अइसे करये ठगी, किस्सा ल सुन आप मन भी हो जाहु हक्का बक्का….
रायपुर 25 अक्टूबर 2020। राजधानी पुलिस ह दू अइसन प्रेमी जोड़ी ल पकड़े हे, जेन ह वकील अउ जमीन के ब्रोकर बनके जमीन बेचने अऊ खरीदने वाला मन ल अपन ठगी के शिकार बनावत रिहिस हे। पकड़े गे दुनों आरोपी ह अबतक के प्रदेश के 100 से ज्यादा मनखे मन ल अपन शिकार बना चुके हे। ऐखर मन के ठगी के लिस्ट म प्रदेश के रिटायर्ड डीएसपी से लेकर कई नौकरी पेशा मन मन भी शामिल हे। राजधानी पुलिस ह आज ये बड़का मामला म खुलासा कर ऐखर जानकारी दे सकत हे।
रायपुर म आधा दर्जन शिकायत, एसएसपी ह दिस कार्रवाई के आदेश..
दरअसल पुलिस ल शिकायत मिले रिहिस की राजधानी म लबरागिरी करके जमीन बेचने अऊ खरीदने वाला मन से ठगी होवत हे। पुलिस ल अइसने ही आधा दर्जन ले ज्यादा शिकायत मिले के बाद रायपुर एसएसपी अजय यादव ह मामला म जांच के आदेश दिस हे। एडिशनल एसपी लखन पटले, क्राइम एडिशनल एसपी अभिषेक माहेश्वरी के नेतृत्व म पुलिस अउ सायबर के सयुंक्त टीम के मदद म जांच शुरू करे गिस। जांच के दौरान पुलिस ह टूरी-टुरा सहित दु झन ल पकडिस हे। दुनों ह एक दूसरा से प्रेम करथे अउ रायपुर म ‘लिव इन’ में किराये के घर म रहत रिहिस हे। पकड़े गे आरोपी म सिमरन लालवानी (23) लाल बाघ सिंधी कॉलोनी राजनांदगांव, पद्भमन शर्मा सेंट जोसेफ स्कूल अमलीडीह राजेन्द्र नगर रायपुर के रहवइया हरे। दुनों झन के खिलाफ 420 के तहत अपराध दर्ज कर पुलिस पूछताछ जारी हे।
लबरागिरी कर अइसे बनाइस मनखे मन ल अपन शिकार….
पकड़े गे दुनों आरोपी मन के करतूत ल सुनहुँ त आपो मन ल यकीन नहीं होई कि दिखे में छोटे अऊ काम ह अतका बड़े की रिटायर्ड डीएसपी ल भी ठग डारिस हे। रायपुर पुलिस के अब्बड़ प्रयास अउ मेहनत के बाद दुनों प्रेमी जोड़ी ल पकड़े म कामयाबी मिले हे। पकड़े गे टूरी-टुरा ह पुलिस पूछताछ म बताइस हे कि, ये मन ह पहली पेपर म जमीन खरीदी बिक्री के विज्ञापन देखए ओखर बाद कॉन्टेक्ट नंबर म फोन करके सामने वाला से बात करये। आरोपी पद्भमन शर्मा ह खुद ल ब्रोकर बता के जमीन के सौदा करवा दुंहुँ बोलये, अऊ जमीन के लीगल फार्मेल्टी ल पूरा करे के नाम पर अपन वकील के नंबर देवये। ऐखर बाद आरोपी के संगवारी सिमरन लालवानी ह अपन नाम सिवानी अऊ खुद ल वकील बताके सामने वाला से बात करये। सिमरन ह जमीन संबंधित प्रोसेस फीस य अऊ कोई बहाना करके जमीन खरीदने-बेचने वाला से हजारों रुपिया मांग लेवत रिहिस हे। ऐखर बाद पैसा लेके अपन मोबाइल ल बंद करके वो जिला ले दूसरा जिला भाग जावत रिहिस हे। अइसने ही दुनों झन ह कई झन ल अपन शिकार बनाये रिहिस हे।
एक जिला म 15 दिन से ज्यादा नहीं रुकत रिहिस..
पकड़े गे दुनों आरोपी अब्बड़ शातिर हे। ये बारे म जानकारी देवत हुए रायपुर सायबर अऊ क्राइम एडिशनल एसपी अभिषेक माहेश्वरी ह बताइस कि, “दुनों झन ह अबतक के प्रदेश के 100 से ज्यादा लोगन ल चुना लगा चुके हे। जेन जिला म ये मन ठगी के घटना ल अंजाम देवए वो जिला म मुश्किल से 15 दिन रुकत रिहिस हे। दुनों ल पकड़े में पुलिस ल अब्बड़ मशक्कत करना पड़िस हे। अब दोनों ह पुलिस के गिरफ्त में हे अऊ दुनों झन से ये मामला म पूछताछ जारी हे।”